نظم
گنی دنيا ښه ده
غني خاند بېغمۍ لږ خوب
لږه خندا ښه ده
نېټه ئې لږه ده
گنی دُنيا ښه ده
څوک وائی هغه ښه ده
څوک وائی دا ښه ده
ما له زما ښه ده
اؤ تاله ستا ښه ده
چا له ژړا ښه ده
چاله خندا ښه ده
زړۀ د مجنون له
خپله لېلی ښه ده
زړۀ د ملا له
توده حلوا ښه ده
چا له مستی ښه ده
چا له سودا ښه ده
چاله محل ښه دے
چا له بېديا ښه ده
چا له هغه ښه ده
اؤ چاله دا ښه ده
ژوند ته ساز ښه دے
مړ ته دعا ښه ده
بڼيا له سود ښۀ دے
ما له سودا ښه ده
د ملا عقل له
خوله د ملا ښه ده
زما کوتک له
ملا د لال ښه ده
مزدور وې خان ته
خبره دا ښه ده
ما له ټېپر بد دی
تا له حلوا ښه ده
د جرمن توپه ښه ده
د صېب قلا ښه ده
زمونږ ټټو ښه دے
د پنډت غوا ښه ده
خبره ښه د گاندهی
خوله د جناح ښه ده
چا له هغه ښه ده
اؤ چا له دا ښه ده
ما له زما ښه ده
اؤ تاله ستا ښه ده
نېټه ئې لنډه ده
گنی دُنيا ښه ده