گوگل

دې گوگل کښې مې دننه

هم دوزخ دے هم جنت

دې کښې قهر اؤ غضب دے

دې کښې رحم اؤ راحت

دې کښې پروت يو سمندر دے

د نشې اؤ د خُمار

دې کښې پروت يو تهترين دے

د لمبو اؤ د ازار

دې کښې پروت دے دومره رنگ

د سپرلی اؤ د خندا

چې يو پړق ئې پور جهان کړی

د مستۍ اؤ د رڼا

دې کښې پروت دے دومره رنگ

د تيارې اؤ د ژړا

چې يو اُف ئې تور لحد کړی

د خندا ډکه دُنيا

دې کښې دومره شجاعت دے

چې د کُل جهان مرگونه

يو نظر کښې تار په تار کړی

لکه باد وړی بوسونه

چې په يره باندې راشی

زړۀ تې غټ دے د منږک

داسې رپی داسې تښتی

د اوبو څاڅکے تې کلک

اؤ چې کلک شی داسې کلک دے

لکه کاڼے د فولاد

نۀ پې زر تورې اثر که

نۀ پې زر کاله فرياد

دې گوگل کښې مې دننه

هم دنيا ده هم قيامت

دا هم لاره هم کاروان دے

هم تدبير دے هم قسمت

پروت په دې کښې ټول داستان دے

د جزا اؤ د سزا

خور په دې کښې لوې جهان دے

د وصال اؤ د وفا

دا هم باغ دے هم خزان دے

هم بلبل دے هم بهار

دې کښې سرۀ نيازبين گلونه

اؤ د شنو اوبو شرار

دا هم زهر هم زقوم دے

هم گبين دے هم نبات

دا هم تور د مرگ څادر دے

هم چينه ده د حيات

دۀ کښې پروت داسې شراب دے

چې يو څاڅکے د هغې

به بدمسته اؤ سرشاره

کړی دا واړه فرشتې

دې چې ځی په بره درومی

شی جبرئيل ورته حېران

چې په بدو باندې راشی

امان وغواړی شېطان

عجيبه دې يم جوړ کړے

اے زما خدايه عجبه

بې د تا نه نور د هر څه

د همه يم مرکبه

دا د اور او نُور درياب

دومره لوې لکه اسمان

دومره ړوکے لکه څاڅکے

دومره لنډ لکه يو ان

دا قيصه د سوز اؤ ساز

ولې ولې څۀ له څه له؟

خېشت اؤ غم راز و نياز

ولې ولې څۀ له څه له؟