نه یې سیال نه یې نظیر شته په جهان کې

بو علي باندې نازیږي افغان ځکه

رب ورکړی دې وطن ته استعداد دی

ترینه زیږي دا نامتو  فرزندان ځکه

دمشرق رئيس او شیخ دفلسفې ؤ

یادوي ئې نن دعلم دوستان ځکه

دده فکر ؤ قانون شفا دپاره

په حکمت کې یې موجز دی بیان ځکه

چې دده نبض شناسه ګوتې  نشته

دمرض له ویرې رګ دی لړزان ځکه

که هر څو ورپسې ګرځی نه یې مومی

دی ترور او سرګردانه آسمان ځکه

ځمکې هسې  اولادونه لید تر اوسه

پسې سر په څیړۍ ګرځي هر آن ځکه

که پخوا ځمکه ساکنه ځای په ځای وه

ناقراره ئې اوس ویني انسان ځکه

راوتلی ؤ له ځالۍ داسمانه

دده فکر کاوه  جګ جګ طیران ځکه

ډیره لویه هستی شوه دخاورو لاندې

بلخ دده له غمه وینمه وران ځکه