په داسې حال کښې

حقوق دانان وي نوکران د خان

قاضي فاسد مفتي فاسق او فاجر

جرگه د صلح وي خانان ملکان

هر يو له بل نه غلطی کښې ماهر

شاهد کذاب وي مصدق يې خاين

د حق ليدو ته ړوند، قدرت ته ناظر

رشوت رايج وي واسطه نافذه

کوي ډې کار د چا لحاظ او خاطر

مساوات نه وي وي تبعيض امتياز

حق ته نظر وي بېخي شاذ او نادر

دعوی وي مينځکښې د فقير او غني

يو ډېر غريب بل د الماسو تاجر

چې زور حاکم وي ظلم وي مشاور

وکيل جابر وي يا وکيل د جابر

په داسې حال کښې عدالت غوښتنه

د حماقت خو هم يو حد وي آخر

يو د قاضي په وره کښې څوک نه پرېږدي

د بل په وره کښې قاضي هر وخت حاضر

يو له نظره د هر چا لوېدلی

د بل ساقي ستايي غزل کښې شاعر

يو خوا خيرن زاړه شکېدلی کالي

بل وي اغوستي لباسونه فاخر