صلح کل

له واړه کوره راوځه لوی جهان سره اشنا شه

خېل او قام نه را اوچت شه له انسان سره اشنا شه

له هگۍ نه رابهر شه په قفس کښې مه اوسېږه

له دې ټيټې هوا پورته له طيران سره اشنا شه

د زمان مکان په قيد کښې اوسېد نه اسارت دی

محدود مه اوسه هر گوره لامکان سره اشنا شه

د بندي فکر خاونده دوهمو نظر بنده!

که ذهني آزادي غواړې له عرفان سره اشنا شه

که دځان په شان انسان ته درېدلی يې سرکوزی

ځان دې نه دی پېژندلی له خپل ځان سره اشنا شه

چې د جاه و جلال بت ته په سجده باندې نسکوريې

بې ايمانه راته ښکاري له اېمان سره اشنا شه

چې سړی هر څومره لوی شي تر ځان لوی سره آشنا شي

والا شان سره آشنا شوې دخدای شان سره اشنا شه

د جهان تاريخ ته ځيرشه د بدلون اړخونه گوره

کُل يَوم هُوَفیِ شَانِِِ دي له هر شان سره اشنا شه

اور اوبو سره دې کار دی په خوږو ترخو ژوندی يې

صلح کل شه! د اضدادو، خاندان سره اشنا شه