ستا ټول کارونه خدایږو دي برای نام غوندې

رامعلومیږي ستا فکرونه راته خام غوندې

هغه کارکړې چې ساده ګان ورباندې ژر غولیږي

دقام خادم نه یې دنورویې  غلام غوندې

ریا او ظلم ارتجاع سره دښمن یمه زه

له ډیر ناکامه درته  کړمه احترام غوندې

رښتیا رښتیا به وایم زه که هر څه پيښ شي راته

اخر به کړم  دټولو خلکو درته پام غوندې

زمانه ډیره شوه هوښیاره ته لا ئې هغسې

تر څو به موږ ته پرتې وائې  دسرسام غوندې

په ټول عالم دسپین سبا شپه شوه دټولو سحر

په تا راځي نوی تیاره  اوسدماښام غوندې

څه چې مرغان وو ټول ازاد شوه قفسونه شوه مات

ستا ببر سر او څڼې ښکاري راته دام غوندې

دپڼو غل  خلکو دمخه کړ چې غلا ونکړي

اودس ئې نه ؤ په لمانځه کې شو امام غوندې

داسې لمونځونه دې ډیرکړي  دي دخلکو مخ کې

نیسې روژې  خو روژه ماتې وي حرام غوندې

څادر دې سپین لکه سبا دی په خپل سر خورکړی

مخ دې چې ګورم راته ښکاري تور ماښام غوندې

ډیر دې غلط کړه توره  شپه دې لکه ورځ وښوده

په نیمه پوه شه دابیان دی ناتمام غوندې