طمع مه کړه دنيا کې دنشاط

طمع مه کړه دنيا کې دنشاط

بيا به نه مومې نشاط په دا بساط

لکه راغلې بيا به هسې ځنې درومې

دا جهان دی د رهرويو يو رباط

تر هر گام لاندې کوهی دی ددې دهر

ايښی بويه هر قدم په احتياط

و دانا وته په دا جهان ښکارېږي

هم جنت او هم دوزخ او هم صراط

په عاشق به هېڅ دهشت د رقيب نه و

که يې نه کړی له خوبانو اختلاط

له کم اصله بې ديانته بې نمازه

طمع مه کړه د نېکۍ د يو قيراط

غم د ترکو تر رحمان هسې چاپېر شه

لکه وسکڼې جامه په چا خياط