توره، پښتو، پښتنواله

چې په توره مري شهيد دی هغه نه بې پردې کېږي

چې بې تېغه وي مړ شوي په تخته باندې لوڅېږي

پښتنواله نام و ننگ دی

ننگيالی اصيل پښتون دی

ځان وژل دننگ د پاره

د پښتون سړی ژوندون دی

سربازی زمونږ هنر دی

توريالی مو افلاطون دی

فيصله د تيغ په ژبه

د پښتو رسم و قانون دی

توره حق او حقيقت دی

شريعت پرې رڼا کېږي

تورې شپې دملتونو

بې له دې نه سبا کېږي

هم دغه شرف يې بس دی

چې په توره غزا کېږي

د ظالم او خدای ناترسه

ورنه خوف او حيا کېږي