څوک څه پوهېږی؟

څوک څه پوهېږي سبا څه راوړي له ځانه سره

په کال کښې نه وي هغه څه چې وي له آنه سره

زمانه پټه خامله وي خو خبره نه وي

څه ورسره وي چې به فکر کښې له سره نوی

څه راځي؟ څه کېږي د چا په لاس د چا د پاره

شپه په تياره کښې زيږوي څه د سبا ديد

د تورې شپې قهرمان يو او د سبا بل وي

تيارو کښې پټ بل څوک ظاهر کښې رهنما بل وي

لکه نطفه د انقلاب چې خپل طوفان نه ويني

د آغاز سترگې د انجام قهرمانان نه ويني

ډېر تغييرونه زمانې سره دنيا ته راځي

نوی فلمونه د زاړه ښار سينما ته راځي

څوک ډرامي جوړوي څوک يې تمثيلونه کوي

سياستونه په هنر کښې ډېر کارونه کوي

تراژيدي کاندی کوميډی سپين لکه تور ښيي

ډېر مقدس د خدای نعمت د سوټی زور ښيي

په پټه خوله لگيا وي خلکو ته زندان جوړوي

په چيغو چيغو خلک کاڼه کړي چې پلان جوړوي

دا په صحنه کښې ظاهري متحرک به څوک وي؟

اصلي علت اصلي عامل پټ محرک به څوک وي؟

زمونږ نظر خو يو څو توی قوارې ويني

د لوبېدونکو نا آشنا جعلي څېرې ويني

بې روحه عکس حرکت کوي خبرې کوي

هر څه چې کړي هغه پرده کښې مونږ نه لرې کوي