څومره ښکلي معلومیږي               دوطن غرونه رغونه

سپینې تورې وریځې ونم               دلته هلته غرونه غرونه

داڅه کیف او څه مستي ده            په مستۍ راغله رودونه

راپیدانوي مرغان شول              اورم نوي سرودونه

داتڼ دپاره زاڼو قطار جوړ کړ په هواکې

ښځې نر یو ځای ګډیږي دویساک په تما شا کې

په اسان کې ډزې کیږي           لویه ورا لویه ښادي ده

بوډۍ ټال دی اچولې           بیا دلوبو تیاري ده

سرې او شنې لیکې ښکا ریږي            دا تابلو دپسرلي ده

که هر چاته ښکاره کړی              فلک خپله دورنګي ده

غړوسکه غړوسکه وریځې وینم داسمان غیږ کې ګډیږي

که په سپینو مخو باندې وربلونه تور ښکاریږي

دبهار بادونو راوړل                    سحر باغ ته پیغامونه

ونو واچول په غاړه                   دګلانو امیلونه

له مستۍ په نڅا راغلې                وړې څانګې لوی ښاخونه

دسحر ما ښام ګډا کې                 شوي یو دبل هارونه

څه ښادي ده پدې باغ کې راته ووایه مالیاره

ونو بوټو په سر کړي شنه شالونه څه دپاره

کال شو نوی موسم بل شو               په ګلونو بهار راغی

دسرو ګلو هار په غاړه               دبلبلو قطار راغی

داغ دمینې په زړه باندې                  ښایسته لا له زار راغی

دبهار وږمو سره بیا                    مستي راغله سینګار راغی

اسمان بل  شو ځمکه بله  هوا بله معلومیږي

جلوه بله  نغمه بله  مینا بله معلومیږي

دګل پاڼو کې سور اور دی              چې بلبل کړي فریادونه

که دګل بوټي ته وایې                دخپل سوي زړه حالونه

همدغه سوی نغمې دي                   دبهار ارمغانونه

څوک غزلې ورته وايي                  څوک دعشق حکایتونه

چې هیڅ کله نه زړیږي  دبلبلو ترانه ده

چې هر چاته ښه ښکاریږي  دښایسته ګلو غنچه ده