هوبرگيه هو

پېښ په لېونی باندې شو پيښ لېونے يؤ

وې روره په يورپ کښې سړے کئ د سړو لؤ

بانگ کښې د سبا مې پرون نوې ټپه واؤرېده

تلې ؤم خالصې ته راته ئې ووې "تهکے ناؤ"

پريږده باچاخانه دا د جېل قيصې دې خوشې دی

دال مې نۀ هضميږی زۀ عادت يم په پولاؤ

واؤره د يورپ نه د انصاف خوږې خبرې

واؤره مږې واؤره د پيشو بې بی مياؤ مياؤ

يو نهنگ غټ شوے وۀ کبان ئې ډېر خوړلی وو

بل نهنگ پرې راغې اوبۀ سرې شوې د تلاؤ

يخې د قسمت گوتې مړوند کله مرۍ نيسی

پښې کۀ ځان له ماتې گډاگی کړی په داؤ داؤ

بخت بېوفا يار دے ديوغېږ کښې بل ته خاندی تل

وۀ پرون عربو سره نن د صېب سره ؤ

خداې خبر سبا به چاته خاندی خندوی به څوک؟

مونږ نه خو خفه بوتۀ ملا علی داؤ داؤ

دلته چرگوټۍ ده کړکه، جنگ ئې په اگو وشو

ورکړو د چابۍ موټر له بيا فېرنگۍ تاؤ

کور کښې د قصاب غويان په وچو تاڼټو نښتی دی

هو لنډيه، هو برگيه، هو چړگيه هو