يو' ان

قسمته کښېنه په ارام کښېنه

سبا له وليکه چې څۀ دې خوښ وی

د سپين سبا په مخ خالونه کېږده

چرته اور چرته نُور لالونه کېږده

تراخۀ به خورمه کۀ تراخۀ دې خوښ وی

خو اوس مې يار لږ مُسکے شوے دے

قسمته چپ شه، ژونده شه په قرار

وخته د خداې د پاره سا واخله

دغه لمحه مې کړه دکال مقدار

سبا شو ستا خو نن که يار واکدار

ټول ژوند دے ستا دا يو بڅرې زمونږ

ټول ژوند مې واخله خو دا سات پرېږده

نن دې دفتر که بند اؤ سترگې پټې

قلم دې مات که داسې مات پريږده

واؤره، اوه، واؤره دوه خبرې زمونږ

په توره شپه کښې د غم څاڅکی د رنگ

پرېږده چې رنگ پرې ټول جهان کړمه زۀ

د خزان سترگو کښې تصوير د گلاب

دمقبرې په مينځ کښې شرنگ د رباب

جمدون، ځوانی، قسمت مې ستا دی واخله

قسمته ماته دا يو ان پرېږده

سبا له تور که ټول جهان په تيرو

خو دا لمحه ما اؤ جانان پرېږده

بس چې زۀ وليکم د زړۀ په کتاب

د خزان سترگو کښې تصوير د گلاب