زه څوک يم

زه بل څوک نه يمه اولاد د غريبانو يمه

سکنی ورور د عاجزانو دخوارانو يمه

يمه له خاورو نه پيدا خورمه له خاورو پيدا

د لاس نيالگی ددې غريبو دهقانانو يمه

ماته آغا ماته بادار ما ته صاحب مه وايه

ډېر ويرېدلی له نامه د صاحبانو يمه

چې ورته بل نيسي اوبه نور يې بې آبه غواړم

وينو ته تږی زه دداسې بادارانو يمه

د بل زحمت کښې چې خپل ځانته راحتونه غواړي

د سر دښمن ددې بې رحمه ظالمانو يمه

زما په زړه کښې د بل چا محبت مه لټوئ

زه دخوارانو د ډيوو له پتنگانو يمه

چې شپه او ورځ په خوار غريب خپل خدمتونه کوي

د دوی خادم نه يم خادم د خادمانو يمه