نظم
زما محل
غني خاند سيند د سپينو شگو نه مې جوړ کړو يو محل
دې ټول خرگی جهان ورته حېران حېران کتل
قالين مې پکښې خور کړو د سرو پاڼو د گلاب
اوچت ئې دېوالونه دسازونو د رباب
بيا رنگ مې ورله ورکړو د خوبونو د شباب
هر گل مې ورله راوستۀ ماليار مې کړو بلبل
دې ټول خرگی جهان ورته حېران حېران کتل
نرگس مې په غېږ راوړۀ هم مېلمه مې کړۀ رامبېل
نسيم په خندا راوړل زيړ گلونه د چامبيل
شراب مې ورله ورکړل بيا د اوښکو د بلبل
دې ټول خرگی جهان ورته حېران حېران کتل
رڼا مې د سپوږمۍ کړه د زهرا پستې غزلې
خندا ته د تنځرو ښکلې زر کې گډېدلې
د ستورو مستې سترگې غلې غلې رپېدلې
رو رو پرې مستی راغله دخدايۍ اور ئې کړۀ بل
دې ټول خرگی جهان ورته حېران حېران کتل
يواځې زۀ بادشاه ؤمه په سر مې تاج د غم
په خوا کښې مې دلبره وه مُسکۍ سترگې پرُنم
نازکه نازنينه پاکه ښکلې لکه گل
دې ټول خرگی جهان ورته حېران حېران کتل