دامير محمد خان د خط جواب د جېل نه

چې سُرونه غم کښې روک شی

نشه خلاصه شی په جام کښې

چې خيام دمېخانې نه

توبه گار شی په ماښام کښې

چې ژوندون د مرگ د ويرې

د غُلام په شان راغونډ شی

دغه وخت کښې فرق ورک شی

په ساقی اؤ په امام کښې

ستا ډېرۍ د سرو ټيکرو

نۀ توبې نۀ پېمانې دی

دا د مرگ نه تېښته تېښته

دا دهوش هوس کانې دی

دا چې ژوند د مرگه ستړے

ډډه ووهی کنډر ته

چې مورچه پرېږدی اميد

دمايوسو تور لښکر ته

دغه وخت کښې فرق روک شی

د تيارو اؤ د جلال

دغه وخت ساقی مُلا شی

اؤ ايرې شی سپين مشال

دغه وخت د هوتی خانه!

زهر واچوه په جام کښې

چې تۀ فرق نه شې کؤلې

په مات جام او مړ امام کښې