ټالۍ

ژوند مې ټال دے زۀ پرې زانگم

زړۀ د خيال په نيلی سور دے

د قسمت پړی اوږدۀ دی

خېژومه پرې ټالۍ

څۀ دی څۀ دی بدکۀ ښۀ دی

د ديواله اخوا څۀ دی

چې محراب د ملا جان دے

کۀ خمار د ملالی

زۀ د مټو په زورپړ يم

زۀ په اوږی نظر پړ يم

زۀ د ځان سره سيالی کوم

زۀ پړ نۀ يم په سيالۍ

زه د خېشت مقام لټومه

رنگ اؤاز خيال اؤ نظر کښې

لکه څاڅکے تله واخلی

تلی زور په سمندر کښې

که دفکر تېز نظر دے

د قسمت دېوال محکم دے

دېخوا دېخوا خو به سم کم

خو دا غم د اخوا غم دے

زه بوټے د رڼا څاڅکے

په يو تور اؤ ورک جهان کښې

د خپل خود په رڼا گرځم

د قسمت کوڅې لټومه

د ټال پړی که پاخۀ وی

کۀ نری وی کۀ وراسته وی

زۀ ټالۍ خو به خيژومه

زۀ ټالۍ خو به خيژومه